أعاني لوعة الفرقا حزين وخاطري مكسور‎

أعاني لوعة الفرقا حزين وخاطري مكسور
حزين وغربتي طالت جريح من يداويني

أنا ليه ثلاث سنين وتتبعهن ثلاث شهور
أقاسي لوعة ابعادك سهيرٍ ماغفت عيني

تحسبيني على بعدك سعيد وعايشٍ مسرور
أنا والله ياحبي فراقك حيل مشقيني

رماني حظي العاثر على بعدك وأنا مجبور
وحيدٍ ماطرى إلا أنتي وغيرك ماتسليني

شربت المر من كاسه شربته والزمان يجور
يبعدني عن عيونك وزاد الجرح جرحيني

سهيرٍ ماغفا طرفي أسامر دمعي المنثور
أخايل طيفك العابر احاكيه ويحاكيني

ذكرت أحلى ليالينا وتمنيت الزمان يدور
ذكرتك واقفة جنبي يدينك تحضن يديني

ولكن الزمن واقف علينا يفرض الدستور
صدر دستوره القاسي .. وفرق بينك وبيني

علشانك أعيش الهم أعيش بدنيتي مقهور
وفيّ ماعرف غيرك مادام أنتي ملكتيني

وأنا جيتك من الغربة حزين وخاطري مكسور
غريبٍ غربتي طالت وشوفك حلم في عيني